مشاركة أولى

قررت ارجع للتدوين من تانى ...عشان اثبت لنفسي إنى لسه عايش...!!!

هاكتب عن ايه مش عارف ..

هازهق امتى وارجع للقوقعة الصامتة برضه مش عارف..

حياتى مليانة بالافكار المتضاربة والاسرار الضخمة اللى شايلها لوحدى فوق كتافى 

مليانة بالأخطاء الفادحة والندم والخوف والقلق المتواصل 

افكار كتير شاغلانى ومشكلات مالهاش حل .. حلها الوحيد فى رأيي إني أنساها او اتعمد نسيانها ..الحل ده بيريحنى جدا وبيخلينى اقدر اضحك مع الناس اللى حواليا واكمل حياتى فى شكل شبه عادى بحيث على الاقل انى ابان امام الناس انى انسان عادى زيي زى كل البشر..

ممكن الاسلوب ده يكون بينتهجه ناس كتير من اللى حوالينا وعايشين معانا وهانتفاجأ فى النهاية ان كلنا بنمثل على بعض 

الهواجس دى هانتكلم فيها كتير متقلقوش ..

ولو حد من الناس اللى بيتابعونا وعايشين دور البطولة المؤلمة فى تمثيلية الحياة حب يتكلم عن نفسه مفيش مشاكل يشرفنا وينورنا

 

قالوها زمان الكلام بيريح.. فعلا الكلام بيريح

بس فيه مشكلة تفتكروا احنا عندنا وقت للكلام...؟؟!!

بمعنى ادق احنا ممكن يكون عندنا وقت ووقت كبير بس المشكلة هى هل احنا لينا نفس نتكلم؟؟؟!!

المشاركة الاولى فى المدونة مش عاوزينها تكون يائسة 

نرجع لمرجوعنا هانتكلم في ايه؟؟

والحقيقة انا قررت !!!

قبل كده كنت بتكلم فى موضوع واحد ادب اخبار تكنولوجيا ..

بس كنت بزهق بسرعة لأن الموضوع بيحكمني وكنت بلاقى اخبار وموضوعات كتير عاوز اتكلم عنها لكن مكونتش بقدر لأنها بتخرج عن سياق المدونة 

انا قررت بإذن الله انى اتكلم فى كل حاجة وسميت المدونة كل حاجة عشان كده..

اي حاجة هاتعجبنى هانشرها وهاتكلم عليها لأن فى النهاية المدونة بتاعتى لازم تكون مراية بتعبر عن نفسي وبتعكس صورة حقيقية لصاحبها..

تحياتى وانتطروا جديد موضوعاتى

إمتى؟؟!! الله اعلم

لما هاحس هاكتب ...